عيد الطفولة... شعر

بمناسبة الإحتفال بيوم الطفل .. أهدى هذه القصيدة لكل طفل:

قصيدة بعنوان : عيد الطفولة

عيد الطفولة ده أجمل عيد

ربى يعيده علينا سعيد

لجل ما يهدى الطفل سعادة

تملا حياته بفرحة زيادة

ويقيد شمعه زي العادة

ويخليلنا شموعنا تقيد

عيد الطفولة ده أجمل عيد

==============

عيد الطفولة سفينة حب

بيها نعدى بحور الصعب

علشان نبقى فـ أحسن حال

والمستقبل يصبح عال

مع إهتمامنا بالأطفال

وتعود لينا البسمة أكيد

عيد الطفولة ده أجمل عيد

==============

عيد الطفولة بطعم الشهد

ولا يوم مرة بيخلف عهد

عام ورا عام نلاقيه فـ ميعاده

هل علينا بكل وداده

وأما يجينا نلاقى فؤاده

ساقى الحب لكل وليد

عيد الطفولة ده أجمل عيد

==============

عيد الطفولة ده عيد الكل

ياللا نفرق فيه الفل

على أطفالنا وعلى أحبابنا

على قرايبنا وعلى أصحابنا

وأما بشايره تدق بيبانا

نفتح نلقى الفرح يزيد

عيد الطفولة ده أجمل عيد